注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

余少镭:现代聊斋

筚路蓝缕,啸聚山林

 
 
 

日志

 
 
关于我

余少镭

毕业于广东省饶平师范学校(中师),现为《南方都市报》文化副刊部编辑、记者、专栏写手。

网易考拉推荐

2·4 三十而立(栋笃论语·为政第二)  

2007-02-15 22:42:49|  分类: 乱弹论语 |  标签: |举报 |字号 订阅

  下载LOFTER 我的照片书  |

  【原文子曰:“吾十有五而志于学,三十而立,四十而不惑,五十而知天命,六十而耳顺,七十而从心所欲不逾矩。”

  【译文】孔子话:“我十五岁立志要学嘢,三十岁自成一家,四十岁就冇咩唔明嘅,五十岁识得点样顺应同埋掌握命运,六十岁就赞弹都听得入耳,七十岁更加就想做乜就做乜,而且一啲都唔会过分。”

  【栋笃】嗱,孔Sir呢段话,喺《论语》入边又係好出名嘅嘞,几乎每一句都係成语添。因为孔Sir讲嘅,唔单止係自己嘅“学习简历”,亦都係所有人嘅“人生轨迹”。孔Sir三岁老窦就过咗身,自细家贫,为咗改变命运,细细个就立志学嘢博出位,仲四围求学。到咗三十岁左右嘅时候,孔Sir学有所成,就建立咗自己嘅一套理论体系,仲开始办私立学校添;再过十年,人生、社会嘅种种问题,孔Sir都谂清楚晒嘞;过咗五十岁,孔Sir开始明白到,谋事在人,成事在天,天命不可违,人力係有限噶;六十岁以前,有学生唔生性,或者听到唔同嘅意见,孔Sir就会好嬲,但过咗六十岁,佢就咩都听得,一啲都唔嬲嘞。譬如嗰年有次,孔Sir带学生要去陈国,经过郑国都城嘅时候,孔Sir荡失咗路,企喺东门度等学生返嚟揾佢,人哋笑佢嗰样好似一只“丧家之犬”,孔Sir听到就笑住噉话:“係噉噶嘞,係噉噶嘞。”七十岁之后,哇,不得了噃,孔Sir嘅人生修炼入咗化境,冇得顶嘞,佢想做乜就做乜,自由到飞起,而且唔会触犯礼教添!有人话:“哇,有冇咁巴闭啊?”孔Sir就係咁巴闭嘞,唔係嘅话,点做儒家超级无敌掌门人啊?剑道嘅最高境界,係人剑合一,手中冇剑,心中有剑;人道嘅最高境界,亦係“人仁合一”,行为不仁,仁在心中——咪话七十,就係八十,“从心所欲”娶返个廿八嘅老婆仔,边个够胆话佢“逾矩”啊?
  唔知点解,我又谂起咗网上流传嘅一段话,同阿孔Sir嘅话简直“异曲同工”,係讲男人嘅:“二十奔腾,三十日立,四十佳能,五十微软,六十松下,七十联想。”嗰啲“非礼”嘅解释,我就“勿言”嘞,费事激嬲阿孔Sir嘅在天之灵。从另一方面去解释,佢同孔Sir嘅话,係好一直噶。你睇,“二十奔腾”,少年壮志不言愁,粪土当年万户侯,细佬哥激情爆棚,直情係“满而溢”,正係“志于学”嘅表现;“三十日立”,正係大佬我壮志骄阳,器宇轩昂嘅时候;“四十佳能”,男人四十一朵花吖嘛,乜都识,乜都做得,能量发挥到最佳状态,梗係“不惑”嘞;“五十微软”,嗱,五十嘞阿叔,知唔知咩叫“力不从心”啊?精力有限,天命难违,打咩羊胎素啊,好心留返啲钱做家用嘞;“六十松下”,退休嘞阿伯,精神紧张咗几十年,依家冇晒压力,唔使再博,可以放松下嘞;“七十联想”,梗係嘞,“从心所欲”就剩返联想吖嘛,阿爷我唔郁得,谂返以前点样奔腾、点样日立、点样佳能都得啩阿Sir?阿Sir话:梗係得嘞,只有犯罪愿望,冇实施犯罪,点会“逾矩”啫?“咁八十又点啊?点解唔讲八十啊?”嗱,八十呢,因为孔sir73就过咗身嘞,“身后事”点讲得啊?依家人都长寿,八十九十寻常事,过咗七十,就好似人生又可以重头“奔腾”过嘞。头先讲咗,你想学人哋,娶返个廿八嘅老婆仔都得噶——不过,噉就唔係“奔腾”,而係“奔腾Ⅱ”嘞:)
  人嘅一生,係咪就噉度过噶?     (插图:老饼)

  评论这张
 
阅读(202)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017