余少镭：现代聊斋

　　【原文】子之燕居，申申如也，夭夭如也。

　　【译文】燕居，即闲居，得闲冇事嘅时候；申申，个样好舒展嘅意思；夭夭，神色愉悦噉解。
　　孔子喺屋企得闲冇事嘅时候，个样系好舒展嘎，神色系好愉悦嘎。

　　【栋笃】嗱，一句笑话系噉讲嘅：样衰唔系你嘅错，出嚟吓人就系你唔啱嘞。讲老实话，孔Sir个样，照史书嘅记载睇嚟，系好肉酸嘎。好彩，佢畀佢嘅学生、支持佢或者反对佢嘅人留低嘅印象，一啲都冇“吓人”嘅感觉。点解呢？
　　用依家嘅话嚟讲，孔Sir有“大家风范”。
　　大家风范，唔单止系表现出“阿Sir”或者乜乜“大成至圣先师”应有嘅样——如果好似后世啲“道学家”噉，成日黑口黑面扮晒嘢噉，唔单止自己攰，喺佢周围嘅人，都会觉得攰嘎。噉所以，“大家”仲包括埋佢平时喺屋企、喺家人面前或者独居嘅时候，表现出嚟嘅嗰种舒展、怡然自乐嘅仪容。
　　系咩令到人可以咁“申申如也”、“夭夭如也”呢？答案就系：心平气和。孔Sir后生嗰阵，系一个咩都睇唔顺眼嘅“愤青”，因为喺佢心目中，呢个世界简直世风日下、人心不古、礼崩乐坏，见到咩都有“是可忍孰不可忍”嘅愤怒。但系，“四十不惑”之后，人开始“知天命”，开始“耳顺”，开始识得点“忍”，好自然噉，内心就会逐渐归于平和。呢种平和，唔系话佢放弃咗恢复周礼嘅努力，而系知道咗“谋事在人，成事在天”，知道咗历史发展嘅规律，从一个向诸侯推销仁政嘅理想主义者，过渡到一个教书育人、传播文明嘅现实主义者。
　　喺依家呢个竞争激烈嘅社会入边，现代人最缺乏嘅，就系呢种“申申如也，夭夭如也”嘅平和嘞。冇错，竞争使人进步，但亦都容易令到人心浮气躁。呢种心态，唔单止喺公司、喺社交场所、喺公众场合出现，亦都会带返屋企，就算喺独居嘅时候，亦都冇办法有一种平和嘅心境。最常见嘅“资讯焦虑症”呢一类心理问题，就系噉出现嘎。
　　为自己嘅健康谂下，为社会嘅和谐谂下，读下《论语》，学下孔Sir嘞