注册 登录  
 加关注
   显示下一条  |  关闭
温馨提示!由于新浪微博认证机制调整,您的新浪微博帐号绑定已过期,请重新绑定!立即重新绑定新浪微博》  |  关闭

余少镭:现代聊斋

筚路蓝缕,啸聚山林

 
 
 

日志

 
 
关于我

余少镭

毕业于广东省饶平师范学校(中师),现为《南方都市报》文化副刊部编辑、记者、专栏写手。

网易考拉推荐

6·16 口才与相貌(栋笃论语·雍也第六)  

2008-01-23 21:07:27|  分类: 乱弹论语 |  标签: |举报 |字号 订阅

  下载LOFTER 我的照片书  |

  【原文子曰:“不有祝鮀之佞,而有宋朝之美,难乎免于今之世矣!”

  【译文】孔子话:“冇祝鮀嗰把靓口,又冇宋朝嗰副靓样嘅人,喺今时今日,系好难避免灾祸嘎!”

  【栋笃】睇到上边呢句译文,细心嘅读者可能会觉得:咦,好似唔啱㖞——“而有宋朝之美”,分明系“而有”,点可以翻译成“又冇”呢?
  咪住,讲解下咩系“祝鮀之佞”同埋“宋朝之美”先。祝,即系喺寺庙入边负责祭礼嘅人,祝鮀系卫国大夫,佢系出咗名嘅口甜舌滑、能言善辩。《左传》入边记载咗,有一次,诸侯喺一个叫召陵嘅地方开咩“武林大会”,其中有一个程序,就系好似依家黑社会噉“歃血盟誓”嘞。本来,按规定,歃血嘅时候,蔡国排喺卫国嘅前面——表示地位高吖嘛。估唔到,喺歃血之前,祝鮀喺各位揸fit人度活动,凭住三寸不烂之舌,卒之畀卫国排喺蔡国嘅前面。其实噉嘅人,喺春秋战国时期系特别多嘅,大家熟悉嘅晏子、蔺相如、苏秦、张仪等等,都系一把口胜过千军万马嘅“佞人”。
  讲到“宋朝之美”,就有一啲八卦嘢嘞。宋朝,唔好误会,唔系历史上嘅赵宋王朝,而系宋国嘅公子,个名叫“朝”。宋朝生得又靓又正,系各国少女嘅梦中情人嚟嘎。不过,当时嘅狗仔队,就挖到佢同卫灵公夫人——“绯闻女王”南子(宋国人)“旧情复炽”嘅爆炸性新闻嘞。《左传》入边仲记载咗:“卫侯为夫人南子召宋朝。”卫灵公自己同自己笠顶绿帽,共享精神直情感人肺腑添啦。
  卫灵公同埋南子呢两公婆,一个中意祝鮀口才好,一个中意宋朝个样靓,各有所好,各取所需,本来就相安无事,但系,有人就睇唔过眼嘞——边个?梗系孔Sir嘞。卫国,系孔Sir周游列国准备施展佢平生抱负嘅第一个国家,谂唔到,佢喺卫国住咗好耐,一啲都得唔到重用,眼白白噉睇住啲口才好、身型靓嘅人得宠,佢个心会点谂?梗系好唔妥嘞。所以,佢讲“巧言令色,鲜于仁”;又讲“不知其仁,焉用佞”。至衰嘅系,佢好彩先得到南子嘅召见,两人虽然喺密室独处咗阵间,但因为孔Sir个样核突,吓亲阿南子,两人就真系“坐而论道”,“让时光白白流走”,孔Sir“吃不到羊肉惹一身骚”,仲畀学生子路“不悦”,搞到佢要对天发誓佢同阿南子真系咩事都冇发生……你话,对于宋朝噉嘅“面首”,孔Sir会有好说话讲咩?
  对于孔Sir呢种心理,五代丘光庭写嘅《兼明书》入边就讲得好好听嘞:“此孔子叹末世浮薄,所尚者口才与貌耳。如此则不得云‘而有宋朝之美’, 盖此‘而’亦当作‘不’,传写误也。”听到未?
  可惜呢,历史系不因孔Sir嘅意志为转移嘅,两千年过去,又佞又美嘅人,不嬲都系“时代的宠儿”嘞。你睇依家啲用人单位,点解要搞啲咩口试、面试,仲唔系为咗拣啲又佞又美嘅“人才”?

  评论这张
 
阅读(164)| 评论(0)
推荐 转载

历史上的今天

在LOFTER的更多文章

评论

<#--最新日志,群博日志--> <#--推荐日志--> <#--引用记录--> <#--博主推荐--> <#--随机阅读--> <#--首页推荐--> <#--历史上的今天--> <#--被推荐日志--> <#--上一篇,下一篇--> <#-- 热度 --> <#-- 网易新闻广告 --> <#--右边模块结构--> <#--评论模块结构--> <#--引用模块结构--> <#--博主发起的投票-->
 
 
 
 
 
 
 
 
 
 
 
 
 
 

页脚

网易公司版权所有 ©1997-2017